E kölsch Verzällche: Heimat

Wäm jeit et nit och ens esu? Mer hät dat Jeföhl, de Deck fällt einem op der Kopp. „Ich muss ens eruss he, ich halden et nit uss hee!“ Die Reiseprospekt flejen einem en Masse en der Breefkaste un üvverschlagen sich met de Schnäppcher. Italie, Spanie, Türkei, un wo nit söns noch wohin. Jot, un dann ess mer fott!

De ehschte Woch jeit dat och jot. Ävver dann: Nä wat ess dat he en Hetz! Jetz e lecker Kölsch kütt et einem en der Senn. Un och söns, dä janze fremde Fresskrom?! Mer kritt Ammelung op Himmel un Äd met Blootwoosch odder ne Halven Hahn, un mer hann doch ehsch de Hälf vum Urlaub öm.

Wä kennt nit, et Heimwih, wat mer dann kritt? Un su jitt et en janze Häd kölsche Leeder, die dovun verzälle. Der Ostermanns Well hät dat allt en singem Leed „Heimwih noh Kölle“ besunge, wat en Kölle zor Nationalhymne jewooden ess: „Wenn ich su aan ming Heimat denke un sinn der Dom su för mer stonn. Mööch ich tireck op Heim aan schwenke, ich mööch ze Foß noh Kölle jonn.“

Un dä Hape Kerkeling meint en nem Bläck-Fööss-Leed: „Un ich lauf he allein durch en janz fremde Stadt. Un ich hann nirjens Buchping för Heimwih jehatt! He ess alles am schloofe, he brennet nirjens e Leech, un dann denk ich aan Kölle un dann denk ich aan Dich.“ Op die Frohch, wat bedück Heimat?, hät bestemmp jeder en ander Antwoot …

Mänch Fremdche kann dat nit verstonn un meint, mer Kölsche wören heimatbesoffe, wat immer mer dodrunger verstonn well, ävver; „Et gitt kei Wood, dat sage künnt, … wann ich an Kölle denk …“, singe Cat Ballou. Un die Paveier meine: „Heimat ess jo nit blos e Woot nor. Heimat ess die Sprooch un sin die kölsche Leeder. Heimat ess do, wo du verstande wees.“ Mer muss nit en Kölle jeboore sin, öm Heimatjeföhle ze hann. Do wo ming Famillich lääv, wo ich Fründe hann un Arbeid, wo ich mich wohlföhle, do, wo ming Sproch jesproche weed, wo mer mich versteit, do ess Heimat!