60 Johre „KölnerLeben“

Wat ha’mer dis Johr nit all’ för Jubiläe:

100 Johre Neue Universität
200 Johre Jacques Offenbach
100 Johre Bauhaus
950 Johre Weihejubiläum St. Gereon
60 Johre LVR Köln Landeshaus
un dann noch 60 Jahre KölnerLeben

Fröher heeß dat Stadtmagazin Der Feierabend un ess am 1. Dezember 1959 et ehschte Mol en Kölle erussjekumme. Vörren op dem Titelblatt sohch mer fünf Engelcher. Dat woren wal die Schotzengele, die op de Kölsche, besonders op die Äldere odder Ahle, oppasse sollte. 1.500 Blättcher sin domols jedrock woode, die dann en städtische Heime, die domols noch „Feierabendheime“ heeße, verdeilt wooden sin. „Feierabendheime“ wore nix anderes wie Levvensfierovendheime (hück sät mer „Altenheim“, „Seniorenstift“ odder fing jesaat „Senioren-Residenz“ dozo), met Lückcher alsu, die nit mih arbeide moote. Mänch einem ess et schwer jefalle, noh nem Levve voll met Wöhl un Brass op eimol nix mih dunn ze künne. Dat soll jo och hück vill „Pensionäre“ su jonn un off kütt et vör, dat die malätzich wäde, et ärme Deer krijje un flöck stirve.

En däm neue Blättche also kunnt mer lese, wat en Kölle loss ess un wo mer Hölp fingk, wa’mer Hölp bruch. Och wat mer noch maache künnt odder wo mer sich nötzlich maache kann. Die älder Lückcher sollte nit mih nor drop waade bes Fierovend ess un se en die Kess kumme. Die Idee ess wie en Bomb enjeschlage. En de 1960er Johre wor dat Heffje allt en Holland, Luxemburg, en der Schweiz, Südafrika, Chile, USA, Nicaragua un Japan bekannt. All die Kölsche, die et doherr verschlagen hatt, hatten jetz e Stöckelche Heimat.

Av dem Johr 2003 heiß dat Blättche KölnerLeben, wat heiße soll Leben in Köln, en Informationsquell vun Tipps, Termine un Kuntakte. Mer woss wo mer för ömesöns erenkütt odder et nit vill koss, denn mänch einer muss met de Jröschelcher sparsam ömjonn. Et ess en Zeidung jewoode, nit nor för „Seniore“, „junge Ahle“, „BestAger“ odder „Silver Ager“, et ess en Informationsquell för Ahle un Junge. Ich jedenfalls freue mich immer, wann dat Blättche en mingem Breefkaste litt. Alsu, hätzlije Jlöckwunsch zom 60-jöhrije Jubiläum KölnerLeben.